FORLAGIÐ EKSIL

Dómurin eftir Franz Kafka komin út á Forlagnum Eksil

2012-02-14T11:27:00.001-08:00

Stuttsøgan Dómurin eftir hin víðagitna jødiska rithøvundan Franz Kafka er komin í føroyskari týðing. Eksil hevur longu givið út søguna Umskapanin, sum gjørdist vælumtókt í Føroyum. Hetta er sjeynda bókin hjá Eksil síðani 2007, og aðrar eru í væntu her í 2012.

Tey flestu kenna Franz Kafka (1883-1924). Hann var jødi úr Prag, ið skrivaði á týskum, og verður av mongum sæddur sum profetiskur høvundur, ið spáddi um 2. heimskríggj.

Sjálvur gav Kafka bara nøkur fá av verkum sínum út. Teirra millum eru søgurnar Dómurin og Umskapanin. Eftir at hann var deyður, gav vinmaður hansara Max Brod út tær tríggjar ólidnu skaldsøgur hansara: Sakarmáið, sum er gjørd til film, Borgina og Amerika. Sjálvur tók Kafka til um søguna Dómin:

Soleiðis sum eg síggi tað, eigur Dómurin at verða givin út fyri seg av tí, at tann søgan er sera lýrisk og ikki so episk, og tí haldi eg henni tørva gott pláss, tí annars riggar hon kanska ikki. Eg eri annars nógv bestur við hana av øllum mínum verkum, og eg havi tískil altið fegin viljað, at hon skuldi sleppa at verða givin út einsamøll, um nakar møguleiki var fyri hesum.

Franz Kafka í brævi til forlagið hjá Kurt Wolff hin 19. august 1916.

Av verkum Kafkas finnast á føroyskum: Umskapanin í týðing Agnar Artúvertins og nøkur stutt prosabrot. Agnar Artúvertin hevur eisini týtt hesa bókina. Høgni Egholm Magnussen hevur gjørt permuna og sett upp. Joan Sørinardóttir hevur staðið fyri týskum samanburði. Katrin Reinert og Marius Staksberg hava givið málsliga leiðbeining. Stuðul er veittur frá Mentanargunni Landsins og Fjølrit.

Søgan Das Urteil hevur fingið føroyska heitið Dómurin.

Bókin er 48 bls. og hevur týska tekstin á vinstru síðu og føroyska tekstin á høgru síðu. Hon kostar 98 kr.

MILLUMLENDINGAR yrkingar Vónbjørt Vang

2011-04-10T10:51:00.000-07:00

MILLUMLENDINGAR – nýtt yrkingasavn eftir kvinnuligan debutant

42 síður * 140 kr * Kápumynd og uppseting Lena Nicolajsen

Savnið ”Millumlendingar” hjá Vónbjørt Vang (f. 1974) opnar seg sum ein floymandi, uppreksandi myndagerð, har rúmið verður víðkað við longsli og nærveru. Stílurin er spælandi og ironiskur. Málið er modernað og nærum provokerandi óhátíðarligt.

Evnið í hesum yrkingum er um at finna heim, flytingar, um ikki at festa røtur. At royna at festa røtur. Endurkomandi myndir eru fráferðin og heimferðin, tíð, spor og minnir. Sjónin og navngeving stýra hesum yrkingum, tað neyva gerandisliga, tað vanliga og banala hava høvuðsleiklut. Savnið er sum ein fortættaður og tematiskur abstraktur ringur ella umferð av evnum, sum tosa saman, ið arbeiða seg smakkandi og sansandi rundan um tað ósagda og tað ósigiliga.

Skelkandi bók

2011-04-10T10:38:00.000-07:00

Dilemma

140 kr * Kápumynd Daniella Andreasen * Uppseting Lena Nicolajsen

Daniella Andreassen debuterar við hesi nýskapandi prosabókini sum upprunaliga er sprottin úr eini bloggfrásøgn. Bókin er um eina unga føroyska kvinnu sum sjálvstilvitað og við stórum dirvi sigur frá síni søgu sum ein føroysk skrivandi kvinna í 21. øld.

Sum verk er bókin samansett, bæði málsligt og innihaldsligt. Her eru innantanna einarøður, frásagnir, dialogar og yrkingar. Bókin er í sjey pørtum, sum kunnu minna um eina skrivaða dagbók í sjey dagar. Gerandisliga málið og blandaða málið, sum í støðum ikki himprast fyri respektleyst at skifta frá føroyskum til danskt er sum málburðurin annars ein mynd av kreppuni ella tí dilemma sum persónurin sum sigur frá er í. Sum ein av teimum 2500 ungu kvinnum sum mangla í Føroyum. Meiri í ætt við Victoriu Wild, Silviu Henriksdóttir enn Heðin Brú.

Ravnar á ljóðleysum flogi – yrkingar úr uppgongdini yrkingasavn Sissal Kampmann

2011-04-10T10:32:00.000-07:00

Ravnar á ljóðleysum flogi – yrkingar úr uppgongdini

84 síður? * 140 kr * Kápumynd Ludvík Breckmann * Uppseting Janus Kampmann

Sissal Kampmann debuterar við savninum “Ravnar á ljóðleysum flogi – yrkingar úr uppgongdini”. Fyrsta yrkingin í savninum sendir okkum beinleiðis inn í ein heim, har ein ferð móti eini nýggjari byrjan og endin á eini farnari tíð arbeiða framm ímóti hvørjum øðrum í eini ringrás, fyri at enda at røkka saman. Men áðrenn endarnir røkka hvør ørðum, skal søgan um alt tað, ið liggur ímillum sigast.

2007-07-02T11:29:00.000-07:00

Tíðindaskriv

Læn mær oyra títt

Ein langferð frá munnmentan til KT-samfelagið

Nýggja Forlagið Eksil útgevir bókina "Læn mær oyra títt", hon kostar 150 kr og er myndprýdd øll sum hon er í litum.

----

Tað er høvundin og granskarin Bergur Rønne Moberg, sum í hesum døgum útgevur hesa forkunnugu bók á Forlagnum Eksil.

»Læn mær oyra títt« er sniðgevin sera hegnisliga og unikt av Ole Wich, sum hevur klárgjørt bókina til eitt serligt litríkt prenttøkni.

Tøkni og orð

Innihaldið í bókini er ein langferð frá munnmentan til KT-samfelagið. Hon snýr seg um sambandið millum tøkni og orð.– Orðið var upphavliga munnligt og øll vitan partur av munnligari arvagongd. Seinni gjørdi prenttøknin skrivaða orðið algongt í bókum og bløðum.

Elektronisk mentan

Í dag er orðið eisini vorðið elektroniskt og verður sent á ymsum bylgjum í elektroniskum loft- og margmiðlum sum útvarp, sjónvarp og teldu, sigur høvundurin.

Munnliga, skrivaða og elektroniska orðið virka saman í ymsum høpum. Men tey umboða í grundini hvør sín samskiftishátt og enntá hvør sína mentan.

Sterkar kreftir eru uppá spæl

Bent verður á, at samskifti er meira enn tøkni og boðsending.– Tá mál og samskifti broytast, eru sterkar kreftir uppi í leikinum, sum í stóran mun hava givið mannasøguni skap, sigur Bergur Rønne Moberg.

Føroysk dømi verða eisini tikin fram til tess at myndlýsa hetta mentanar- og menningarmynstrið.

Hetta er eitt sera viðkomandi perspektiv í einari mentan sum tí føroysku við einum serligum samtíðarleika millum hesar miðlar.

FORLAGIÐ EKSIL
Leiðari er Kim Simonsen
Úti í Bø 14
Fo-510 Gøta
00298 44 19 73/ 58 79 52

Eintøk kunnu keypast við at skriva til: outsidermagazin@gmail.com

2007-07-02T10:57:00.000-07:00

Tíðindaskriv

FORLAGIÐ EKSIL

Heimsklassikari loksins komin á føroyskum máli

Í dag hevur nýggja Forlagið Eksil útgivið føroysku týðingina »Umskapanin«, ið er kendasta verkið eftir Franz Kafka og eitt av kendastu verkunum innan heimsbókmentir fra 20. øld. Hon fæst í bókhandlum í Føroyum fyri 140 kr.

Tann føroyska týðingin av »Die Verwandlung« sum hon eitur á týskum, er nú loksins komin í bókhandlarnar. Týðarin er Agnar Jógvansson.

Umskapanin hevur hesa kendu byrjan:

"Ein morgun vaknaði Gregor Samsa úr marrudreymum og fann út av, at hann í song síni var umskaptur til eitt stórt skordýr".

Hendan langa stuttsøgan er eitt tað kendasta modernistiska prosaverkið í 20. øld – hon er ein mynd av fremmandagerðingina, sum modernisman hevði við sær.

”Kafka...er miklasti týski rithøvundur í okkara samtíð. Skald sum Rilke, ella skaldsøguhøvundar sum Thomas Mann eru dvørgar ella bringumyndir av halgimennum samanbornir við hann”, tók kendi russiski høvundin Vladimir Nabokov til.

Listamaðurin Jóannes Lamhauge hevur prýtt permuna og sniðgivið bókina, sum er prenta í offset prenti í Keypmannahavn. Bæði málkøn í týskum og í føroyskum hava gjøgnumgingið bókina.

Bókin hevur verið ávegis leingi

»Tað hevur verið sera hart arbeiði við hesari týðingini – harðari og drúgvari enn vanligt – men harafturímóti er manningin eyka vælnøgd við úrslitið. Eg veit ikki, hví hesin klassikarin, sum einki mál kann vera fyriuttan, ikki langt í verðini síðan er útkomin í føroyskari týðing. Eg fáist nú við at leggja aðrar føroyskar týðingar av klassikarum til rættis.«, sigur týðarin Agnar Jógvanson, sum er BA í bókmentum frá Onglandi.

Vælegnað til skúlanæmingar

Forlagið v/ Kim Simonsen metir, at tað eru slíkar bøkur, sum fara at hækka støðið á føroyskum bókmentum munandi, og eisini gera, so møguligt verður at fylgja við í bókmentaligum rákum á føroyskum máli.

Forlagið upplýsir, at bókin eisini inniheldur ein stuttan inngang eftir og ein útgang eftir týðaran, hetta ger bókina sera væl egnaða sum undirvísingartifar til eldru flokkarnar í fólkaskúlanum, næmingar í miðnámsskúlunum og á lærdum skúlum, har bókin kann brúkast í mál og bókmentafakum, so sum føroyskum, donskum, týskum o.s.fr.

Franz Kafka

Franz Kafka var føddur og uppvaksin í Prag í 1883. Pápin var ein ríkur jødiskur kekkiskur keypmaður. Franz las løgfrøði. Líðandi gjørdist tað honum ein ótolandi byrða at noyðast at tjena til lívsins uppihald við skrivstovuarbeiði. Hann segði tí upp og halgaði seg skrivingini burturav. Hann trúlovaðist nakrar ferðir, men gjørdist sjúkur av tuberklum og flutti á eitt sanatorium at búgva.

Kafka var sjúkliga kenslusamur, og hopleysu romansurnar hjá honum, eins væl og trupla sambandið við pápan, oyðiløgdu til endans heilsu hansara, og "hungursárini" í Berlin eftir 1918 vóru dropin. Hann doyði í 1924. Sjálvt um Kafka var kekki, skrivaði hann allar sínar bøkur á týskum. Sjey teirra vórðu útgivnar meðan hann enn var á lívi. Hann skrivaði tríggjar skaldsøgur, sum allar komu út eftir hann var deyður - "Der Prozess" kom út í 1925, "Das Schloss" í 1926 (óliðug) og "Amerika" í 1927.

Agnar Jógvanson

Agnar Jógvansson er BA í evropeiskum heimspeki og bókmentum frá ARU í Onglandi, og virkin týdari og høvundur. Hansara fiktivu ferdafrásagnir eru vælumtóktar millum føroyingar, av tí at tær eru bersøgnar og ráar - tó dyrkar hann eisini tad surrealistiska stuttsøgutekstaslagid, eins væl og aforismurnar. Umskapanin er hansara onnur útgáva. Agnar arbeiðir við at týða fleiri norðurlenskar skaldsøgur.

FORLAGIÐ EKSIL
Leiðari er Kim Simonsen
Úti í Bø 14
Fo-510 Gøta
00298 44 19 73/ 58 79 52